Video tregon pamje nga sherri i ndodhur javën e kaluar në Tiranë, ku mbeti i plagosur një 20-vjeçar. Në pamjet e shihet se si Ajdin Ajvazi godet disa herë me thikë në trup Aron Demirajn.
Ngjarja ndodhi mesditën e të enjtes së 21 nëntorit, në rrugën “Sotir Kolea”, në zonën e njohur si Qytet Studenti. Gjatë një konflikti të çastit, Ajvazi plagosi me thikë 20-vjeçarin Aron Demirajn. Sherri mes tyre ndodhi në një rrugicë pranë institucionit arsimor privat ku ata studionin.
Pas kreu krimin, autori u largua me shpejtësi prej andej dhe pak minuta më pas u arrestua nga policia. Nga deklarimet paraprake ka rezultuar se dy të rinjtë kanë debatuar fillimisht me fjalë me argumentet se po shiheshin shtrembër dhe po i bllokonin rrugën njëri-tjetrit.
Fillimisht, 20-vjeçarit iu dha ndihma nga kalimtarët dhe më pas u dërgua me urgjencë në Spitalin e Traumës. Ai mori tri plagë, një në brinjë, në qafë dhe në shpatull, por pas ndërhyrjes kirurgjikale ndodhet në gjendje të mirë shëndetësore.
Përveç arrestimit të 19-vjeçarit, banues në Kamëz, policia tha se procedoi në gjendje të lirë shtetasin E. T., 52 vjeç, banues në Tiranë, i cili rezulton nga veprimet hetimore të kryera se i ka shitur thikën autorit të dyshuar.
Discussion about this post