Nisi sot në Tiranë takimi i ministrave të Jashtëm të Procesit të Berlinit me pritjen e delegacioneve.
Takimi i sotshëm pritet të ketë në qendër situatën e krijuar në veri të Kosovës dhe interes të shtuar ka “përballja” midis ministres së Jashtme të Kosovës, Donika Gërvalla, dhe ministrit të Jashtëm të Serbisë, Ivica Daçiç.
Ajo që ra në sy në pritjen e delegacioneve të ministrave të Jashtëm të vendeve të Procesit të Berlinit është takimi i Ministrit të Jashtëm të Shqipërisë Igli Hasani me homologen kosovare dhe homologun serb.
Në pritjen e Daciçit duket ftohja e ministrit shqiptarë dhe sikleti i ministrit serb si një shenjë ftohje midis dy vendeve pas sulmit të një grupi terrorist serb në veri të Kosovës.
Ndërkohë e kundërta ndodhi me takimin me Gërvallën, ku Hasani duket shumë i qeshur dhe i rezervon një pritje të ngrohtë ministres kosovare.
Situata e tensionuar midis Kosovës dhe Serbisë pritet të diskutohet sot në takimin e Tiranës.
Ministrja e Jashtme e Gjermanisë Annalena Baerbock ka njoftuar një ditë më parë se do të ketë një takim me përfaqësuesit e të dy vendeve.
“Baerbock do të bisedojë me liderët nga Serbia dhe Kosova dhe do të vazhdojë t’u kërkojë të dyja palëve të shmangin përshkallëzimin e konfliktit gjatë një takimi të ministrave të Jashtëm të Ballkanit Perëndimor, në Shqipëri”, njoftoi sot një zëdhënës i Ministrisë së Jashtme gjermane.
Ndërkohë, sipas njoftimit të Ministrisë së Jashtme të Shqipërisë, linjat kryesore të Ministerialit do të jenë: forcimi i dimensionit rajonal, nënvizimi i rëndësisë së veçante të këtij procesi në kuadër të integrimit në BE, përforcimi i angazhimit lidhur me Tregun e Përbashkët Rajonal, katër lirive themelore, Agjendës së Gjelbër dhe atë Digjitale, përafrimi me Tregun Unik të BE-së, ruajtja e momentit rivitalizues të arritur në samitin e vjetshëm në Berlin, zbatimi i marrëveshjeve të lëvizshmërisë, forcimi i marrëdhënieve ndërmjet shteteve të rajonit, si dhe përshpejtimi i integrimit evropian.
Discussion about this post