Tonelata të tëra me qumësht kanë ‘larë’ rrethrrotullimin e Savrës në autostradën Lushnjë-Fier. Blegtorë nga i gjithë vendi protestuan për çmimin e ulët të qumështit dhe subvencionet e munguara.
Prej një jave, sipas përfaqësuesve të shoqatës së blegtoreve, fabrikave të qumështit në vend nuk u është shitur produkti.
Në shenjë proteste, tani ky produkt i hedhur në rrugë po kërkon vëmendjen e Autoritetit të Konkurrencës për të hetuar fabrikat e qumështit, të cilat i akuzojnë se kanë bërë marrëveshje të fshehtë për të ulur çmimin e qumështit vendas, teksa i furnizojnë fabrikat me qumësht importi.
Sipas blegtorëve, çmimi i qumështit të tyre që i shesin fabrikave të përpunimit është ulur me 10 Lekë të reja.
Sipas tyre, fabrikat e përpunimit të produkteve të qumështit e blejnë lëndën e parë nga importi, kryesisht nga vendet e rajonit por dhe të Europës.
Për këtë arsye, thanë fermerët, cmimi i qumështit të tyre është ulur.
Ata kërkojnë ndërhyrjen e shtetit dhe shitjen e qumështit të tyre me prioritet para importit.
Discussion about this post