VIDEO – Protestë në Belsh kundër mbylljes së tregut, tregtarët përplasen me policinë bashkiake

Tregtarët e Bashkisë së Belshit kanë dalë sërish në protestë këtë të hënë, kundër vendimit të Këshillit Bashkiak për largimin e tregut nga qyteti.

Policia Bashkiake ka mbyllur derën dhe i ka penguar që tregtarët të dhe përballen me drejtuesit e bashkisë, por ata kanë rezistuar duke e hapur derën kryesore me forcë.

Kjo është hera e disatë që tregtarët u ngritën në protestë, pasi bashkia ka vendosur t`i largojë nga vendi ku tregtojnë çdo fundjavë.

Sipas vendimit të bashkisë, tregtarët që prej 30 vjetësh shesin produktet e tyre në qytet, do të zhvendosen në një treg të ri, i cili është rreth 3 km larg qytetit.

Tregtarët e kanë kundërshtuar këtë vendim, duke u shprehur se largimi nga qyteti, do të sjellë falimentimin e tyre, pasi largësia, sipas tyre, bën që të mos ketë klientë.

Këtë e kanë konfirmuar dhe qytetarët, të cilët gjithashtu janë kundër vendimit të bashkisë për largimin e tregtarëve nga qyteti.

Tregtarët thonë se Bashkia e Belshit nuk është konsultuar me ta kur e ka marrë vendimi, ndërsa shprehen se hapësira e re e caktuar nga bashkia është e pa mjaftueshme për ushtrimin e aktivitetit.

Ndërkohë, Sekretari i përgjithshëm i bashkisë së Belshit, Mustafa Çarçiu tha për mediat se vendi ku zhvillohej tregu është pengesë për turistët dhe se nga aktiviteti krijohej ndotje në rrugë e liqen.

“Normale që kush do të shkojë në pazar do të iki në pazar, njëri do iki në këmbë, tjetri me makinë. Tani është bërë fakt, pazari ka lëvizur. Tregtarët kanë të drejtën e tyre të protestojnë”, tha Çarçiu.