Video – Rinis seanca në GJKKO për Metën, pamjet nga salla e gjyqit

Ish-Presidenti Ilir Meta do të njihet ditën e sotme me masën e sigurisë. Kreu i Partisë së Lirisë u arrestua të hënën nën akuzat për korrupsion, pastrim parash dhe fshehje pasurie.

Për të njëjtat akuza, gjykata ka caktuar detyrim paraqitjeje edhe për ish-bashkëshorten e tij, Monika Kryemadhi. Edhe ajo ka dalë sot para gjykatës për konfirmimin e masës së sigurisë.

Përpara gjykatës dolën edhe Pirro Xhixho e Ema Çoku të cilët akuzohen po ashtu për këtë dosje. Për shkak se avokatët kërkuan kohë të njihen me aktet e dosjes, seanca u shty për disa orë dhe pritet të rinisë në 13:30.Në dosjen prej 176 faqesh, Prokuroria e Posaçme thotë se janë vërtetuar veprat penale korrupsion, pastrim parash dhe mosdeklarim pasurie në disa raste.

Çfarë ndodhi në nisje të seancës

Përballja e parë në sallën e gjyqit mes ish-presidentit Ilir Meta dhe trupës së prokurorëve të SPAK, Altin Dumani, Sotir Kllapi dhe Arben Kraja ka rezultuar me tone të ashpra.

Në sallën gjyqit ka patur tone të forta kundërshtuese mbi mënyrën e arrestimit të kreut të PL-së në momentin që Meta ka hyrë në sallën e gjyqit.

Ish-Presidenti i është drejtuar personalisht kreut të SPAK, Altin Dumani dhe prokurorit Arben Kraja.

Ai e ka quajtur kreun e SPAK si “Dum duman”, “Qen” dhe madje ka kapur veshin duke i thënë “Këtu ta kam, mbaje mend çfarë kam për të të punuar”.

Seanca e sotme në GJKKO zgjati vetëm pak minuta pasi u ndërpre për të rifilluar në orën 13:30, pasi avokatët kanë kërkuar më shumë kohë të njihen me aktet e dosjes duke pretenduar se nuk ishin vënë në dispozicion.

Ilir Meta ndodhej në ambientet e GJKKO në kafazin e xhamtë të sallës së gjyqit dhe jashtë kafazit ishin Monika Kryemadhi, Piro Xhixho dhe Ema Çoku