Një shumë monetare prej më shumë se 680 mijë euro është sekuestruar nga autoritetet në Shkodër. Paratë, siç bën me dije policia, ishin fshehur në një vend të posaçëm në një automjet që futej në Shqipëri nga dogana e Muriqanit.
Shuma monetare e padeklaruar u gjet e fshehur në dyert e modifikuara të automjetit nga efektivët, që arrestuan drejtuesin e mjetit, 51-vjeçarin Lefter Nela.
Grupi hetimor dyshon se paratë janë përfituar nga aktivitete kriminale.
“Si rezultat i administrimit të menjëhershëm të informacionit të siguruar nga Drejtoria e Përgjithshme e Policisë së Shtetit, shërbimet e Policisë Kufitare të PKK Muriqan, në bashkëpunim me shërbimet e Drejtorisë Vendore të Policisë Shkodër, finalizuan operacionin policor të koduar ‘Burimi’. Gjatë operacionit, u kap në hyrje të Shqipërisë dhe u arrestua shtetasi L. N., 51 vjeç, banues në Fushë Milot. Nga kontrollet në vijë të dytë, në automjetin që drejtonte ky shtetas, u gjetën në 2 hapësira të modifikuara në dyert e pasme, 680 595 euro, të cilat ky shtetas synonte t’i fuste ilegalisht në Shqipëri”, njoftoi këtë të premte policia e Shkodrës.
Vijojnë hetimet për të provuar burimin e parave, ndërsa materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme, shtuan të njëjtat burime.
Discussion about this post