Dy vëllezër, njëri 17-vjeç dhe tjetri më i vogël, si dhe një person tjetër mbetën të plagosur paraditen e kësaj të premte para gjimnazit “Shejnaze Juka” në Shkodër. Ngjarja e rëndë ndodhi rreth orës 11:10, në momentin kur nxënësit duhet të ishin në mësim.
Sipas të dhënave paraprake, dy vëllezërit po qëndronin përpara portës së shkollës, kur aty mbërriti një grup i rinjsh me makinë. Ne pamjet nga sherri, ku rreth 20 të rinj përplasen fillimisht me grushte, dhe më pas njëri prej tyre, i dallueshëm me xhup të kuq, nxjerr një thikë dhe qëllon dy vëllezërit.
Të tre të plagosurit u transportuan menjëherë në spital dhe aktualisht ndodhen jashtë rrezikut për jetën. Policia e Shkodrës ka njoftuar se një person tjetër nga grupi kundërshtar gjithashtu është plagosur, por ende nuk dihet nëse është goditur nga thika apo nga sende të forta.
Në njoftimin zyrtar, policia bën me dije:“Rreth orës 11:10, në lagjen ‘Kongresi i Përmetit’, dyshohet se janë konfliktuar për motive të dobëta shtetasit A.K., me dy vëllezërit F.Th. dhe K.Th. Të tre janë dërguar në spital për mjekim dhe janë jashtë rrezikut për jetën. Grupi hetimor po punon për zbardhjen e rrethanave të rastit. Në vijim do të jepet informacion më i plotë.”
Kamerat e sigurisë nga bizneset përreth kanë filmuar gjithë skenën, dhe po analizohen nga policia për identifikimin dhe arrestimin e autorëve. Në vendin e ngjarjes është gjetur xhupi dhe kapelja e njërit prej të plagosurve, ku në kapele shkruhet “Pain don’t hurt”, shprehje që simbolizon trimëri dhe forcë.
Motivi i ngjarjes mbetet ende i paqartë, ndërkohë që rastet e dhunës me thika në shkolla kanë tronditur opinionin publik. Ky incident ndodh vetëm pak ditë pas vrasjes së 15-vjeçarit Erion Boba në Durrës.
Ngjarjet e fundit kanë rritur shqetësimin për sigurinë në ambientet arsimore, duke nxjerrë në pah nevojën për masa të shtuara mbrojtjeje dhe ndërhyrje në konfliktet mes adoleshentëve.
Discussion about this post