Shqipëria humbi me rezultatin 0-1 ndaj Polonisë në ‘Air Albania’. Mes shumë tifozëve që e përjetuan keq këtë rezultat, ishte dhe 7-vjeçari Amar Hasani, i cili u bë viral me reagimin e tij. Ishte babai, Hasani që ndau një video në rrjete sociale të vogëlushit, kur shpërtheu në lot pas humbjes së Shqipërisë, e cila më pas u bë virale.
Gjatë një lidhje me Skype për “Abc-ja e mëngjesit”, babai i vogëlushit tregoi se Amari është një tifoz i flaktë i kombëtares. Ai tha se kanë kontaktuar dhe me futbollistin e njohur Klaus Gjasula.
“Që nga viti 2004 jam tifoz i rregullt i Kombëtares dhe viteve te fundit me të gjithë anëtarët e familjes jemi në stadium. Ka pasur dhe ndeshje që kemi përcjellë jashtë Shqipërisë, si në Moldavi. Kështu Amarit që nga mosha 3-vjeçare, filluam t’i vendosnim shallin, flamurin, i flisnim gjithmonë për kombëtaren. Ishte ndeshja e parë e Amarit, ka një vit e më shumë që insiston që ta marr në stadium.“, tha ai.
Duke komentuar momentin kur kuptoi se i biri po qante për humbjen, ai tha: “Mendova se u ul për shkak se ishte i lodhur, dhe po e pyesja u lodhe, nuk fliste. Dhe për një moment ktheva kokën kur shoh që kishte filluar të qajë. Për një moment thashë ta filmoj.”, tregoi ai.
