Edi Rama e shmangu sot interpelancën që opozita i kërkonte me ngulm në parlament, me pretekstin se po inspektonte aksin e ri të rrugëve që po hapen në jug, në segmentet Dukat-Dhërmi. Deri këtu nuk ka ndonjë çudi sepse, si në çdo regjim autokratik, ai që është në krye thjesht tallet me parlamentin.
Por në këtë rast e bukur është forma që kryeministri zgjodhi për të justifikuar “arratisjen” e tij.
Inspektimi i rugëve që u inskenua nuk është në fakt një takim pune, por filmimi i një spoti publicitar që reket ti mbush mendjen publikut se qeveria punon. Po ti shohësh të tre personazhet që figurojnë në videon e shpërndarë në rrjetet sociale të kryeministrit, i shikon se ata janë të paisur me nga një mikrofon.
Pra ata nuk debatojnë për projektet, ata po xhirojnë film. Një kameraman është i vendosur në sediljen e parë të pasagjerit. Një makinë tjetër e ndjek me një me kamer të dytë fuoristradën ku ka hypur shefi i qeverisë. Ndërsa një kamer e tretë filmon nga lart me dron. Po të vëzhgohet me vëmendje drejtori i rrugëve, Evis Berberi është i pajisur me mikrofon.
Ai nuk i raporton shefit të qeverisë, por flet për spektatorët që gjenden pas kamerës. Edhe kryeministri edhe zëvendësja e tij kanë të vendosur mbi bluat sportive nga një mikrofon. Edhe ata aktrojnë në rolin e qeveritarit që kontrollon investimet e bëra.
E gjitha bëhet qesharake kur mendon se si një ditë rutinë pune e një qeveritari kthehet në spektakël. Kudo në vendet demokratike ministrat kryejnë inspektime të tilla, por kurrë ata nuk i shesin ato si stërmundim. Kur ajo që po bëjnë ka një rëndësi të veçantë ata thërresin dhe mediat që mund të bëjnë punën e tyre duke vëzhguar, bërë pyetje dhe raportuar.
Por në telerealitetin e rilindjes gjithçka është kthyer përmbys. Shefi i qeverisë dhe vartësit e tij xhirohen duke aktruar para grupeve të filmimit që punojnë për ta.
Dhe pastaj spote të tilla shiten si punë, për të justifikuar bojkotin e një interpelance në parlament. /Lapsi.al/
Discussion about this post