Lagja Uznovë e Beratit është përballur sërish me vatra të fuqishme zjarri, që dyshohet se kanë qenë të qëllimshme.
Flakët e favorizuara nga era kanë zaptuar një sipërfaqe prej rreth 5 ha me shkurre, ferra e të mbjella. Por ajo që duhet të theksojmë se zjarri është përhapur me shpejtësi edhe në drejtim të banesave të lagjes, ku më së shumti jetojnë familjet e komunitetit Rom.
Dyshohet se zjarri është i qëllimshëm dhe është vënë fillimisht në përroin e Zagores që për momentin nuk ka ujë dhe është i mbuluar me shkurre.
Por era ka favorizuar flakët dhe i ka përhapur ato drejt tokave me të mbjella e banesave përreth. Lidhur me këtë situatë e cila po përsëritet në këtë zonë, kanë qenë banorët e lagjes ata që kanë lajmëruar zjarrfikësen. Këta të fundit kanë lokalizuar në një kohë të shkurtër flakët dhe kanë mundësuar fikjen e vatrave të zjarrit që po i afroheshin banesave, ndërkohë që banorët kishin dalë të gjithë jashtë nga frika.
Sakaq, burime nga policia e Beratit bëjnë me dije se po punohet për identifikimin dhe kapjen e autorëve të zjarrëvënies, ndërkohë që paraprakisht raportohet se janë përfshirë nga flakët rreth 5 ha me shkurre, ferra e të mbjella.
