Agjencia Kombëtare e Mbrojtjes Civile i bën thirrje qytetarëve, që për shkak të zjarrit në përmasa të mëdha në kodrat e Dhërmiut, të shmangin kalimin nga Qafa e Llogarasë.
“Për shkak të situatës së krijuar nga zjarri i rënë në qafën e Llogarasë, në një sipërfaqe me shkurre e barishte dhe që ka shkaktuar tym, u bëjmë thirrje të gjithë qytetarëve të shmangin kalimin në këtë rrugë. Forcat zjarrfikëse dhe të emergjencave janë duke punuar për të vënë në kontroll situatën.
U bëjmë thirrje të gjithë drejtuesve të mjeteve të ndjekin udhëzimet e Policisë së Shtetit dhe emergjencave civile për lëvizjen e tyre, në mënyrë që të lejohen mjetet dhe efektivët të punojnë për shuarjen e zjarrit”, njofton Agjencia Kombëtare e Mbrojtjes Civile, institucion nën varësi të Ministrisë së Mbrojtjes.
Zjarri, nga hetimet paraprake, dyshohet se ra për shkak të një shkëndije elektrike si pasojë e linjës së tensionit të lartë.
Flakët vijojnë të djegin sipërfaqe me bimësi të ndryshme dhe shkurre, ndërsa në vendngjarje ndodhen shërbimet zjarrfikëse, që me ndihmën e helikopterit të FA, vijojnë punën për shuarjen e zjarrit në bashkëpunim me punonjës të OSHEE-së dhe efektivë të Policisë Himarë.
Ndërkohë shërbimet e Policisë kanë vendosur perimetrin e sigurisë për të shmangur çdo rrezik të mundshëm.
Dhërmiu është më i populluar se zakonisht gjatë kësaj periudhe për shkak të sezonit turistik.
Discussion about this post