Deputeti demokrat Bujar Leskaj ka thyer urdhërat e Partisë Demokratike dhe ka marrë pjesë në protestën e zhvilluar sot në sheshin “Skënderbej” në mbështetje të ish-komandantëve të UÇK-së që ndodhen në Hagë.
Duke folur për mediat, Leskaj u shpreh se nuk e intereson qëndrimi i partisë: “Kush po e rruan për urdhërat”, tha ai, teksa largonte mikrofonin e gazetarit.
Në protestë nga radhët e opozitës ka marrë pjesë edhe kryetari i Partisë Republikane, Fatmir Mediu. “Mesazhi im është që jemi një komb. Ajo çfarë bëhet ndaj drejtuesve të UÇK-së është tendenca për të zhbërë historinë e kombit shqiptar dhe duhet të jemi të gjithë bashkë si shqiptar. Disa përfaqësues janë dhe të PS dhe të PD, nuk kemi ardhur të bëjmë politikë, por për të mbështetur një kauzë të drejtë”, tha Mediu.
Protesta ka mbledhur qindra qytetarë me pankarta ku kërkohet drejtësi për ish-komandantët e UÇK-së dhe kritikohet Gjykata Speciale si “raciste dhe serbo-ruse”, duke bërë thirrje që viktimat të mos barazohen me agresorët.
Discussion about this post