Policia e Sarandës ka arrestuar një 41-vjeçar i cili vidhte pompat e ujit në katet e para të pallateve.
Uniformat blu bëjnë me dije se në pranga ka rënë shtetasi me iniciale O.B., me precedente të mëparshme penale për vjedhje.
Gjithashtu, mësohet se një person është proceduar, pasi ushtronte profesionin e berberit pa u regjistruar në organet tatimore dhe po ashtu është shtruar në spital edhe një shtetas, që ka rënë nga kati i dytë i banesës, ku qëndronte.
“Vidhte pompat e ujit, në katet e para të pallateve, identifikohet dhe arrestohet 41-vjeçari, me precedent të theksuar penal, për vjedhje.
Si rezultat i reagimit të menjëhershëm të specialistëve për Hetimin e Krimeve të Komisariatit të Policisë Sarandë, për kallëzimet e disa qytetarëve, se iu ishin vjedhur pompat e ujit, në pallatet ku banonin, është identifikuar, kapur dhe vënë në pranga shtetasi O. B., 41 vjeç, banues në Elbasan.
Nga veprimet hetimore ka rezultuar se ky shtetas, i cili ishte dënuar dhe më parë për të njëjtën veprimtari kriminale, ka vjedhur në mënyrë të përsëritur, pompat e ujit, në katet e para të pallateve të ndryshme, në Sarandë.
Vijojnë hetimet për të zbardhur vjedhje të tjera që mund të ketë kryer ky shtetas.
—
Specialistët për Hetimin e Krimeve Ekonomiko-Financiare të DVP Vlorë referuan materialet në Prokurori ku nisi procedimi në gjendje të lirë për shtetasin S. S., 51 vjeç, pasi ushtronte një aktivitet ekonomik (berber), pa u regjistruar në organet tatimore, si dhe sepse kishte zënë trotuarin përpara subjektit, me tavolina dhe karrige.
Rreth orës 03:00, të mëngjesit të sotëm, Stacioni i Policisë Livadhja është njoftuar se ka shkuar për të marrë mjekim në spitalin e Sarandës, shtetasi A. H., 19 vjeç, i cili dyshohet se ka rënë aksidentalisht nga kati i dytë i një resorti për pushime, në Ksamil. 19-vjeçari është transportuar në Spitalin e Traumës, ku po merr asistencë të specializuar mjekësore dhe është jashtë rrezikut për jetën.
Materialet procedurale i kaluan prokurorive pranë gjykatave të Shkallës së Parë të Juridiksionit të Përgjithshëm Vlorë dhe Sarandë, për veprime të mëtejshme”, njofton policia.
Discussion about this post