Një 45-vjeçar i identifikuar si Ben Sula, ka rënë në prangat e policisë pasi dyshohet se është autori i 19 rasteve të vjedhjes së sendeve me vlerë dhe parave, kryesisht në ambiente ku qëndronin pushuesit gjatë sezonit turistik veror.
Sipas njoftimit të policisë, ky shtetas dyshohet se gjatë sezonit turistik veror të vitit 2021 dhe të këtij viti ka kryer 19 vjedhje, në ambiente të ndryshme, në qytetin e Sarandës. 45-vjeçari ka vjedhur në dhoma hotelesh dhe në banesa të ndryshme, në të cilat qëndronin kryesisht pushues, bizhuteri të ndryshme, aparate celulare, si dhe rreth 500 000 lekë, 11 000 euro dhe 1 000 dollarë.
Gjatë kontrollit fizik, shërbimet e Policisë gjetën dhe sekuestruan, në cilësinë e provës materiale, sende që dyshohet se do të përdoreshin për kryerjen e vjedhjeve të tjera, si dhe shuma parash në euro dhe lekë, të dyshuara të vjedhura.
45-vjeçari ka qenë i dënuar më parë në Itali dhe në Greqi, për të njëjtën veprimtari kriminale. Materialet i kaluan Prokurorisë, për veprime të mëtejshme procedurale.
Discussion about this post