Opozita zhvilloi këtë të premte protestën e 34 përpara bashkisë së Tiranës. Gjatë protestës, u kërkua dorëheqja e kryebashkiakut Erion Veliaj dhe arrestimi i tij. Kjo sipas protestuesve, do të vinte drejtësinë në vend. Veliaj cilësohet nga opozita “pronari faktik i inceneratorit të Tiranës” dhe “koka e bandës së drejtorëve hajdutë të aferës 5D”.
Sekretari i përgjithshëm i Partisë së Lirisë, Tedi Blushi tha “drejtësinë duhet ta bëjë populli”. “Besoj e morët vesh se kush do të jenë 12 drejtorët e rinj të Policisë së Shtetit. Të gjithë të lidhur me krimin e organizuar”, tha Blushi.
Shefi i Organizimit në PD, Klevis Balliu theksoi se beteja nuk do të ndalet, derisa hajdutët të përfundojnë në burg.
“Shqiptarët protestojnë për drejtësi. Në burg shkojnë ata që denoncojnë krimin e tyre, këtu nuk ka drejtësi, sepse këtu ka Skap, nuk ka drejtësi, sepse këtu ka Duman”, tha Balliu.
Këshilltari demokrat në bashkinë e Tiranës kujtoi se opozita do të protestojë edhe ditën e martë para parlamentit kundër miratimit të buxhetit 2025, që e cilësoi “buxhetin e hajdutëve”.
Anëtarja tjetër demokrate e Këshillit Bashkiak, Ilda Zhulali solli në kujtesë problemin e vendparkimeve të munguara për qytetarët në kryeqytet dhe shfrytëzimin e ligjit për ti ndëshkuar nga bashkia, e kthyer prej kohësh në një bandë gjobëvënësish.
“Të dashur qytetarë të Tiranës, do ju jap dy lajme nga fatal-qeverisja. Lajmi i parë është që buxheti i Tiranës për vitin 2024 arriti në 500 milionë euro. Mendoni se çfarë shifre e madhe është kjo për një bashki si Tirana që vazhdon e shpopullohet çdo ditë. Nga i mori 500 milionë euo Veliaj? I mori nga ju, nga taksat që paguani, i mori gjithashtu nga gjobat duke rritur planin e gjobave për qytetarët e Tiranës në 200%. Sa më pak vende parkimi në Tiranë, aq më shumë vijnë gjobat për xhepat tuaj. Lajmi i dytë është që ne këto para që kemi marrë nga ky buxhet 500 ml euro/ 110 ml euro shkojnë për të paguar gjobën për Beketin, kërcënimin që Veliaj i bëri që të mos transmetonte dasmën e tij. Kështu shkojnë paratë e këtij qyteti, prandaj nuk ka para për pensione. Kjo është fatal qeverisje e ne duhet ti themi ndal, o sot o kurrë…”, tha ajo.
Ish-deputeti Belind Këlliçi theksoi se “Veliaj përbën kërcënim të drejtpërdrejtë për sigurinë kombëtare me aferën e inceneratorit dhe është ushtari më besnik i Sorosit”.
Teksa po zhvillohej protesta e PD-së para bashkisë së Tiranës, një efektivi të policisë i ka rënë të fikët. Ndihma e parë iu dha nga kolegët dhe qytetarët e pranishëm në protestë, ndërsa më pas u transportua për në spital me një makinë policie.
Protesta zgjati rreth një orë, ndërsa nga mikrofoni i tubimit u paralajmërua se ato do të vijojnë deri në dorëheqjen dhe arrestimit e Veliajt.
Discussion about this post