Disa ditë më parë një e mitur 11-vjeçare është dhunuar për 7 orë nga 5 burra. Ky fenomen ka ngritur në këmbë mbarë shoqërinë kosovare dhe atë shqiptare.
Policia e Kosovës ka arritur t’i arrestojë të pesë të dyshuarit, ndërkaq ndaj katër prej tyre është shqiptuar masa e paraburgimit prej 30 ditësh. Nga pesë të arrestuarit tre janë të mitur.
Ndërkaq, sot në kryeqytet u protestua për të kundërshtuar dhunën ndaj grave. Protesta nisi nga sheshi “Zahir Pajaziti”e vazhdoi deri te Qeveria e Kosovës. Kjo protestë u organizua nga Kolektivi për Mendim dhe Veprim Feminist.
Protesta e sotme është thirru në mbrojtje të grave dhe vajzave. Gjatë protestës në Kosovë, njerëzit brohorisnin njëzëri “nuk ka më protesta paqësore”, “nuk duam statuse, duam vepra”, “nuk po ndihem e sigurt”.
“Rasti i 11 vjeçares është alarm për të gjithë ne… Në këtë shtet vajzat e vogla abuzohen në shtëpi, shkolla, rrugë e sheshe e parqe”, u tha nga organizatorët e protestës.
“Durimit tonë paqësor po i vjen fundi”, “Boll mo”, “S’ka protesta paqësore më”, u tha në protestë.
Mijëra qytetarë nën brohoritma “Viktima nuk ka faj”, “mbrojtje për viktimat” “Qysh spo ju vjen marre”, “Burgim të përjetshëm” kanë gjuajtur me ngjyrë të kuqe Ministrinë e Drejtësisë dhe Prokurorinë e Shtetit, të njëjtën gjë e kanë bërë edhe në ndërtesën e Këshillit Gjyqësor të Kosovës.
Discussion about this post