Sekuestrohet një pasuri me vlerë rreth 3.5 milionë euro në Elbasan. Sipas policisë, dyshohet që shuma marramendëse të jetë përfituar nga aktivitete kriminale dhe të jashtëligjshme.
Në operacionin e koduar “Fasada”, zhvilluar nga Sektori për Hetimin e Krimit Ekonomik dhe Financiar në Policinë Elbasan, në bashkëpunim me Prokurorinë pranë Gjykatës së Shkallës së Parë Elbasan, u sekuestruan disa pasuri që dyshohet se rrjedhin nga veprimtaritë kriminale të një 46-vjeçari.
Blutë bëjnë me dije se “bazuar në provat e grumbulluara gjatë hetimeve të kryera nga Policia dhe Prokuroria, ka vendosur sekuestro preventive ndaj pasurive të shtetasit Albert Topuzi, 46 vjeç, banues në Elbasan.
Shtetasi Albert Topuzi është autor i dyshuar për veprën penale “Pastrimi i produkteve të veprës penale ose veprimtarive kriminale”, pasi më parë ka qënë i arrestuar në Itali, për veprën penale “Shfrytëzimi i prostitucionit”, në rrethana rënduese”.
Në zbatim të vendimit të gjykatës u bë i mundur sekuestrimi i pasurive të ndryshme, me vlerë rreth 3.5 milionë euro. Konkretisht janë sekuestruar: një ndërtesë trekatëshe, një ndërtesë dykatëshe, 3 apartamente, disa automjete të llojeve të ndryshme, 4 sipërfaqe ndërtimi dhe një aktivitet tregtar (biznes) me objekt prodhimin e betonit.
Nën drejtimin e Prokurorisë po vijon puna për të zbuluar asete të tjera të përfituara në mënyrë të kundërligjshme, që ky shtetas dhe familjarët e tij mund t’i kenë regjistruar në emër të personave të tjerë.
Materialet i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme.
Discussion about this post