Xhevahir Kurti, 41 vjeç ka rënë në prangat e policisë pasi vinte baste nëpërmjet celularit. Policia ra në gjurmët e Kurtit, në lokalin ku punonte, duke vënë baste sportive me anë të një aparati celular, i cili u sekuestrua në cilësinë e provës materiale. Gjithashtu blutë e Krujës proceduan edhe pronarin e lokalit Mehmet Sallakun.
”Vijon operacioni policor i koduar “Fati i lojërave”, goditet 1 rast tjetër i veprimtarisë së organizimit të kundërligjshëm të lojërave të fatit.
Vinte baste sportive me celular, në një lokal, vihet në pranga 41-vjeçari, procedohet në gjendje të lirë pronari i lokalit.
Sekuestrohet në cilësinë e provës materiale, aparati celulari që përdorej për kryerjen e kësaj veprimtarie të paligjshme.
Specialistët për Hetimin e Krimit të Komisariatit të Policisë Krujë, në kuadër të operacionit policor të koduar “Fati i lojërave”, që ka si qëllim goditjen e rasteve në fushën e organizimit të kundërligjshëm të lojërave të fatit, kanë vijuar kontrollet në lokale dhe ambiente të tjera, ku mund të organizohen lojëra fati të palejuara. Si rezultat, është bërë e mundur goditja e një rasti tjetër të kësaj veprimtarie të kundërligjshme dhe arrestimi në flagrancë i shtetasit:
-Xh. K., 41 vjeç, banues në lagjen nr.4, Krujë, për veprën penale “Organizimi i lotarive të palejuara”.
Ky shtetas u kap nga shërbimet e Policisë, në lokalin ku punonte, duke vënë baste sportive me anë të një aparati celular, i cili u sekuestrua në cilësinë e provës materiale.
Gjithashtu nisi procedimi penal në gjendje të lirë për pronarin e lokalit, shtetasin M. S., banues në lagjen nr.4 Krujë, për veprën penale “Vënia në dispozicion e lokaleve për lojëra të palejuara”.”-njofton policia.
Discussion about this post