Rreth 74 mijë shqiptarë janë larguar nga Shqipëria drejt vendeve të Bashkimit Europian gjatë vitit 2022, duke vendosur një shifër rekord përsa i takon largimeve në 13 vitet e fundit.
Sipas INSTAT, gjatë vitit 2022 kanë marrë leje qëndrimi në vendet e Unionit, 34% më shumë shqiptarë krahasuar me vitin 2021.
Në 2014-tën, u vu re një rënie e numrit të lejeve të qëndrimit që jepeshin për shqiptarët, çka nënkuptonte një ulje të kërkesës së tyre për të jetuar jashtë vendit dhe mbarimin e një cikli migrator.
Megjithatë në 2015-të, u vu re një tjetër valë largimesh, që sipas të dhënëve të INSTAT arriti në 70 mijë persona për këtë vit.
Në vitin 2020 u vu re sërish një rënie e numrit të lejeve të qëndrimit të jepeshin për shqiptarët, kjo për shkak të pandemisë, por megjithatë, një trend i ri largimesh u vu re sërish pas pandemisë.
Për 2022-shin, Italia kryeson me afro 35 mijë leje qëndrimi për shtetasit shqiptarë, ndjekur nga Greqia me 14300 dhe Gjermania me 13300, raporton Euronews Albania.
Nga viti 2008, kur INSTAT ka publikuar të dhënat e para, numërohen gjithsej 832 mijë leje qëndrimi për shtetasit shqiptarë që kanë lënë vendin e tyre dhe kanë marrë leje qëndrimi në një nga vendet e BE-së.
Discussion about this post