Partia Demokratike ka reaguar pas nisjes së vitit të ri shkollor, me një sërë pyetjesH drejtuar ministres së Arsimit, Evis Kushi. Deputetja Ina Zhupa shkruan në Facebook se masat që ka marrë nga qeveria për menaxhimin e viti shkollor janë në mos përputhje me njëra tjetrën, teksa shkruan se barrën e kanë mësuesit, prindërit dhe nxënësit.
“Masat covidiane që ka nxjerr qeveria janë: Vaksinim për mësuesit ose testin më të shtrenjtë pcr çdo javë, dy orë mësim për nxënësit dhe të detyruar të mbajnë maska! Masa ekstreme që nuk shkojnë as në përputhje me njëra tjetrën, në një vend ku shteti nuk merr asnjë masë për situatën por gjithë barrën e kanë mësuesit-prindërit-nxënësit.
Zhupa ngre pyetjen se përse duhet bërë mësim me orë të shkurtuara kur mësuesit janë të vaksinuar ose nxënësit mbajnë maska, ose pse nuk janë marrë masat për dezinfektimin e shkollës dhe kushtet higjeno-sanitare.
Sipas deputetes së PD, klasat kolektive apo shkollat me turne janë fenomene që nuk do mungojnë as këtë vit.
“Klasa kolektive dhe shkolla me turne janë dy fenomene që nuk mungojnë edhe këtë vit shkollor. Tekstet aspak cilësore dhe pa filtra kontrolli rigoroz që janë kthyer në makth për prindërit. Mësues të keqpaguar dhe pa mbështetje. Mësuesit me rezultate të shkëlqyera që nuk punësohen edhe ata me teserë partie i marrin vendet në kundërshtim me ligjin”.
Zhupa shkruan ndër të tjera, se Ministria e Arsimit duhet t’i përgjigjet këtyre pyetjeve dhe të tjerave që do drejtojë në komisionin e edukimit.
