Në vitin 2022 do të zhvillohet cens i popullsisë dhe i banesave dhe do të realizohet nga anketues që do të shkojnë në çdo shtëpi. Majlinda Nesturi drejtoreshë e statistikave Sociale pranë INSTAT sqaron se të gjithë qytetarët duhet të përgjigjen dhe të japin të dhënat e parashikuara në formular pasi në të kundërt parashikohen penalitete.
Ajo zbulon se me dëshirë do të jenë vetëm pyetjet që lidhen me fenë dhe etninë. Në censin e 9 viteve më parë këto pika ngjallën reagime të forta brenda dhe jashtë vendit. Censi i banesave ofron të dhëna të detajuara për çdo njësi të cilat do të ndihmojnë më pas në hartimin e politikave të duhura.
Që kur Shqipëria u shpall shtet i pavarur në vitin 1912 cens i parë u krye në vitin 1923. Ndërsa cens i popullsisë dhe banesave i vitit 2022 do të jetë i 12-të që do të zhvillohet. Aktualisht në vend po zhvillohet cens pilot, qëllimi i të cilit është që të provojë në kushte reale hartografinë, metodologjinë dhe strukturën organizative.
