Presidenti francez Emmanuel Macron mbërriti mbrëmjen e së hënës në Tiranë, duke nisur kështu një vizitë zyrtare, ku fillimisht i akordoi shkrimitarit Ismail Kadare titullin më të lartë të lartë të Republikës franceze “Oficer i Madh i Legjionit të nderit”.
“Vepra juaj nuk ka humbur asgjë nga fuqia e saj. Ajo është përforcuar në kundërshtim, është ngritur peshë kundër ndalimit. Ka marrë bukurinë e guximit. Si poet i Ballkanit, si rapsod i Europës, si lajmëtar i lirisë, për këtë lidhje drithëruse që ju mishëroni mes Shqipërisë dhe Francës kam nderin t’ju ngre në gradën e legjionit të lartë të urdhrit të oficerit”, tha Macron në ceremoninë e veçantë që u organizua në Pallatin e Brigadave.
Ndërkohë, gjatë paradites së sotme, Presidenti Macron pati një takim zyrtar me homologun shqiptar, Bajram Begaj, për të vijuar më pas takimin me Kryeministrin Edi Rama, nënshkrimin e marrëveshjeve dypalëshe dhe një konferencë për mediat.
Macron nuk ishte prezent në punimet e Samitit të Procesit të Berlinit, ndërsa për mungesën e tij u tha se ka lidhje me sulmin terrorist në një shkollë në Francë dhe agjendën e ngjeshur të shefit të Elyzee në takime me institucionet e sigurisë në Francë.
E ndërsa Macron është larguar nga Shqipëria dhe vijon ti bëhet jehonë vizitës së tij, e para e një Presidenti francez në vendin tonë, faqja zyrtare e Presidencës franceze nuk ka bërë asnjë njoftim zyrtar lidhur me këtë vizitë.
Në faqen zyrtare të Presidencës, ajo që vihet re është mungesa e agjendës së Macron për datën 16 tetor 2023, ndërsa për datën 17 tetor 2023, thuhet se ende nuk është e disponueshme.
Sqarimi i vetëm i zyrës së Presidentit të Francës ishte mbi një deklaratë që Macron bëri në Tiranë lidhur me Kosovën, nga ku paralajmëroi se “procesi i liberalizimit të vizave mbetet i hapur”, duke kujtuar në këtë mënyrë mos mbajtjen e fjalës nga Qeveria Kurti.
Discussion about this post