Kryeministri Edi Rama deklaroi sot se vizita e ardhshme në Athinë, më 12 maj, nuk ka lidhje me çështjet e brendshme të Greqisë, zgjedhjet për Parlamentin Evropian në Greqi, apo ndonjë narrativë të veçantë që mund të prekë interesin e politikanëve grekë, por që nuk janë në axhendën e qeverisë shqiptare.
Në një reagim në rrjetet sociale, Rama bëri të ditur se “kjo vizitë është pjesë e një sërë vizitash të planifikuara prej kohësh në disa vende evropiane, përfshirë Athinën, për t’u angazhuar me shqiptarët që jetojnë jashtë dhe për të ndarë krenarinë e Shqipërisë për ta dhe vizionin Shqipëria 2030”.
“Kjo është e gjitha që ka të bëjë me vizitën time në fqinjin mik, Greqinë”, nënvizoi ai.
Ndërkohë, kryeministri u shpreh se “është shumë e habitshme të dëgjosh deklaratat e bëra nga opozita greke, ndërkohë që mund ta kuptoj plotësisht pikëpamjen e shprehur nga kryeministri grek”.
Sipas tij, “kontrasti i fortë në pikëpamjet për të njëjtën çështje hedh dritë mbi arsyen pse disa janë në opozitë, ndërsa të tjerëve u është besuar qeverisja nga populli”.
“Megjithatë, siç kryeministri Mitsotaqis theksoi me të drejtë, Greqia mbetet një vend demokratik, që liderë nga kombe të tjera demokratike mund ta vizitojnë, të takohen me bashkatdhetarët e tyre dhe t’i vlerësojnë për punën e tyre të palodhur dhe kontributet e çmuara që ata japin, jo vetëm për vendin ku ata jetojnë, por edhe për atdheun e tyre”, theksoi Rama.
Kryeministri Edi Rama do të zhvillojë më 12 maj një takim me bashkatdhetarët në Greqi.
Lexo edhe:
Discussion about this post