Gjatë mbledhjes së Këshillit Kombëtar të PD, kreu Sali Berisha tha se Amerika është vend i lirisë dhe i demokracisë, ndërsa nuk la pa akuzuar edhe kryeministrin Edi Rama se ka bllokuar procesin e integrimit të vendit në BE.
Berisha akuzoi qeverinë duke thënë se ndërsa gjatë natës vjedhin, ditën flasin për Amerikën, ku sipas tij ky është qëndrimi më anti-amerikan që mund të mbahet.
“Kur të hedhim poshtë me përçmim të gjitha insinuatat, sloganet e atyre të cilët vjedhin natën dhe ditën thërrasin ‘rroftë Amerika’, plaçkisin natën dhe ditën thërrasin ‘rroftë Amerika’. Ky është qëndrimi më antiamerikan që mund të mbahet. Amerika është dheu dhe vendi i vlerave të lirisë. Ajo udhëheq e rrezaton si avokat e lirisë mbi tokë dhe kurrë si mbështetje e plaçkitësve e grabitësve e organizatave kriminale që qeverisin në vende të tjera. Ndaj e s’duhet të kemi asnjë kompleks. Shqipërinë e bëjnë shqiptarët. Misioni ynë është të konsolidojmë në këtë vend ato vlera që kanë bërë të madh çdo komb të lirë. Asnjë komb nuk ka ecur para nuk është zhvilluar në rast se nuk ka mbrojtur interesin e tij kombëtar. Asnjë vend nuk është zhvilluar nëse s’ka pasur një shtet patriotik. Këto janë thirrjet për të gjithë ju, për të gjithë drejtuesit e PD, nëse nuk duam të jemi problemi i saj përsëri”, tha Berisha.
Discussion about this post