Gjykata e Posaçme e Apeli lë në fuqi masën “arrest në burg” për ish-drejtorët e bashkisë së Tiranës, Mariglen Qato, Redi Molla e Taulant Tusha të akuzuar, në dosjen “5D”.
Të pandryshuara nga Apeli janë lënë edhe masat “detyrim për paraqitje” për Eglantina Zëren dhe Julian Zanaj, duke rrëzuar kërkesat e bashkëpunëtorëve të Erion Veliajt, për rrëzimin e masave të dhëna nga shkalla e parë.
Hetimet e SPAK kanë faktuar se Redian Molla dhe Mariglen Qato, si titullar (i pari) dhe me fuksion drejtues (i dyti) të Ujësjellësit Tiranë, i kanë dhënë tendera një firme – 5D Konstruksion” sh.p.k. – që “de facto” është në pronësi të tyre.
Po ashtu, firma e tyre ka marrë tendera të parregullt ligjor edhe nga Bashkia e Tiranës, si dhe “Tirana Parking” e “Klubin Sportiv Tirana” (në varësi të bashkisë).
Për këtë, janë ngritur akuza penale ndaj ish-zyrtarëve të tjerë të lartë të bashkisë: Taulant Tushes, Eglantina Zëres dhe Julian Zanajt.
Në krye të kësaj skeme që përllogaritet se ka zhvatur të paktën 30 mln euro, dyshohet të jetë kryebashkiaku i Tiranës, Erion Veliaj. Ky i fundit ka mohuar akuzat, ndërsa prej javësh para zyrës së tij zhvillohen protesta. Protestuesit kërkojnë arrestimin dhe dorëheqjen e Veliajt të cilin e cilësojnë “kokën e bandës” së drejtorëve hajdutë.
Javën e kaluar, Veliaj iu paraqit në SPAK, ku u pyet si personi në dijeni për aferën e inceneratorit të Tiranës.
Discussion about this post