Teksa vendi është zhytur në një kolaps krize ekonomike, bashkitë kanë rritur detyrimet e prapambetura gjatë këtij viti duke u justifikuar se nuk kanë të ardhura t’i shlyejnë ato.
Shumë prej tyre nuk kanë bërë as investimet që kishin planifikuar për shkak se nuk kanë fonde, por kur vjen fjala për tenderë dhe shpenzime abuzive paratë derdhen nga thesi.
Tre bashki të tjera në vend do të shpenzojnë 7 363 300 (7 milion e treqind e gjashtëdhjetë e tre mijë e treqind lekë) për dekorime festash dhe këtë vërteton Agjencia e Prokurimeve. Në kontrata e publikuara në këtë institucion për këtë javë rezulton se 3 prej tyre janë tendera për dekorime.
Me zyrtarizimin e festave të fundvitit, bashkitë në vendin tonë “bëjnë një sy qorr” për familjet që po jetojnë me të ardhura minimale, por nga ana tjetër gjejnë kohë të thurin plane se si të mbushin xhepat me tendera, duke blerë drita dhe mjete të tjera dekorative. Në dokumentin nga Agjencia e Prokurimeve tregohet se Bashkia Fier është ajo që ka shpenzimet më të larta, rreth 3.2 milionë lekë. Pas saj renditet, Bashkia e Korçës e cila ka shpallur një tender me vlerë 2.9 milionë lekë pa TVSH, ndërsa në vend të tretë renditet Shkodra, e cila do të shpenzojë 1 milion e dyqind e dyzetë e tetë mijë e tetëqind) lekë pa TVSH.
Në total rezulton se, të treja bashkitë do të shpenzojnë 7 363 300 (7 milion e treqind e gjashtëdhjetë e tre mijë e treqind lekë) për dekorimin e qendrave me rastin e festave të fundvitit. Kujtojmë se, pak kohë më parë kryeministri Rama iu bëri vërejtje bashkive në lidhje me shpenzimet dhe detyrat e tyre, por me sa duket ato fjalë qenka harruar shpejt nga kryebashkiakët, të cilët po vazhdojnë me ritëm të lartë shpenzimesh. A.L/ gijotina.com/
Discussion about this post