Reshjet intensive të shiut kanë krijuar mjaft probleme në qarkun e Vlorës me daljen e lumit Vjosa nga shtrati duke sjellë përmbytje në disa banesa dhe izolim të disa zonave.
Mësohet se 11 shtëpi janë përmbytur në Novoselë dhe fshatin Fitore të Vlorës pasi është dëmtuar argjinatura duke përmbytur kështu të gjitha tokat përreth.
Kryebashkiaku Dritan Leli tha se po punohet me materiale inerte për të mos lejuar përmbytje masive dhe janë evakuuar 11 familje deri më tani.
“Kemi 24 orë këtu që dje paradite. Bashkia e Vlorës po sjell materiale inerte për të marrë masa në pjesët më delikate. Momentalisht situata është me e rëndë në pjesën e shtratit të lumit. Janë evakuuar disa familje ndërsa të tjera nuk kanë pranuar të largohen nga banesat. Të gjitha strukturat përkatëse janë në terren”, tha Leli.
Mësohet se edhe ura e Mesaplikut është dëmtuar duke sjellë izolimin e 300 banorëve të kësaj zone. Raportohet se gjatë natës shumë banorë të cilët nuk kanë mundur të kthehen në shtëpi për shkak të urës së pakalueshme janë detyruar të kalojnë natën në automjetet e tyre.
Discussion about this post