Vetëm 7 pikë në tetë ndeshjet e fundit janë dëshmi e momentit të vështirë që po kalon Juventusi, që nga pretendente për titullin, tashmë ka dorëzuar edhe vendin e dytë.
Barazimi ndaj Genoas ishte një tjetër dëshmi e radhës që bardhezinjtë janë larg formës që shfaqën në fundin e 2023-shit, teksa edhe nervozizmi po nxjerr kokë gjithnjë e më shumë mes futbollistëve të Allegrit.
Në sfidën e mesditës së të dielës ishte serbi Vlahovic, që pasi mori një karton të verdhë në fund të ndeshjes, protestoi ashpër ndaj arbitrit, duke e detyruar atë t’i japë edhe një të verdhë tjetër e si rrjedhojë të kuqin.
Natyrisht një ndëshkim lehtësisht i shmangshëm për serbin, që komplikon tërësisht situatën te Juventusi, me bardhezinjtë që për sfidën e radhës ndaj Lazios në kampionat nuk do të kenë në dispozicion as polakun Milik, që është i dëmtuar.
Ndërkohë media pranë klubit torinez bën me dije se kartoni i kuq i Vlahovic nuk u ka pëlqyer aspak drejtuesve të Juventusit, që pritet t’i vendosin një gjobë të majme serbit, pikërisht për papërgjegjshmërinë e treguar.
Discussion about this post