Kukësi ka mposhtur me rezultatin 3-1 Vllazninë, që tronditet në objektivat e saj për të fituar titullin kampion. Verilindorët shënuan dy herë në pjesën e parë me Eze dhe Taipin, kurse Hoxha e hapi lojën për momentin. Në fund Gavazaj realizoi edhe golin e tretë për Kukësin, që tani është më i qetë.
Dueli në Elbasan nisi i vrullshëm, me Kukësin që befasoi Vllazninë me një gol të shënuar nga Patrick Eze. Sulmuesi nigerian me kokë e çoi topin në shtyllë dhe më pas shkoi dhe e shtyu në rrjetë, për siguri më shumë.
Shkodranët nuk mund të pajtoheshin me rezultatin dhe shtylla u bë palë me Kukësin, pas një goditjeje të Victor Da Silva. Jonuzi tentoi në topin e kthyer më pas, por nuk shënon dot. Vllaznia mbetet në sulm dhe dominon.
Gjithsesi gabimet janë të shumta dhe i dhurojnë një penallti Kukësit. Gjelbrim Taipi nga pika e bardhë e 11-metërshit nuk fali, ndryshe nga Eze që në minutat shtesë të pjesës së parë mund ta cconte rezultatin në 3-0.
Brdaric në pushim vendosi të aktivizojë Cisse dhe Avdiaj, kurse më pas edhe Nya-Vedji. Afrikani i Vllaznisë u shfaq i rrezikshëm disa herë, por nuk pati shënjesrën e duhur. Shkodranët fituan një penallti me Avdiaj pas pesë minutash.
Ardit Hoxhaj u tregua i saktë dhe hapi lojën. Vllaznia gjithë kohën qëndroi në sulm për të shënuar golin e barazimit. Në kampin kuqeblu u tërbuan kur u dhanë 4 minuta shtesë, madje arbitri Meta ndëshkoi me të verdhë trajnerin Brdaric dhe kapitenin Gurishta. Në shtesë Zenel Gavazaj shënoi edhe golin e tretë, që i mbylli llogaritë.
