Teksa qyteti i Vlorës prej disa ditësh përballet me mungesë totale të ujit të pijshëm, situata po bëhet gjithnjë e më e tensionuar, sidomos në prag të festave të fundvitit. Banorët janë mbledhur sërish para Bashkisë së Vlorës, duke shprehur revoltën e tyre ndaj institucioneve, të cilat kanë dështuar të japin zgjidhje.
Drejtori i Përgjithshëm i Ujësjellës-Kanalizimeve, Flauers Shoshi, ka deklaruar se pjesët e nevojshme për riparimin e defektit po vijnë nga Turqia dhe se situata pritet të zgjidhet së shpejti. Por kjo deklaratë është pritur me mosbesim dhe revoltë nga qytetarët.
“Na kanë gënjyer disa herë. Na thanë se pjesët vinin nga Selaniku, tani thonë nga Turqia. Po na mashtrojnë,” u shpreh një nga protestuesit.
Sipas tyre, drejtori i Ujësjellësit ka ardhur vetëm për propagandë dhe jo për të dhënë zgjidhje reale. “Erdhi, foli, u largua. Nuk na tha asgjë konkrete. Kjo është tallje,” thanë qytetarët.
Qyetarët janë shprehur se Shoshi është “hallkë të korrupsionit” dhe thonë se paratë janë shpërdoruar ndër vite, ndërsa qyteti mbetet pa ujë. Ata theksojnë se situata është e papranueshme dhe se do të vazhdojnë protestat edhe gjatë natës së Vitit të Ri nëse nuk ka zgjidhje.
Discussion about this post