Ndonëse qeveria propagandoi se nis sot zyrtarisht mësimi me orë dhe kohë të plotë që prej fillimit të pandemisë, duket se situata në shkollën “Lef Sallata” në Vlorë, është ndryshe.
Prindërit e fëmijëve që frekuentojnë këtë shkollë kanë dalë në protestë për të kundërshtuar mësimin e pasdites. Prindërit që po protestojnë janë kryesisht të fëmijëve të një klase të tretë, që është e vetmja klasë nga fillorja që është lënë për pasdite.
“Një fëmijë kaq me çfarë do vijë në shtëpi, unë e kam fëmijën në klasën e tretë C, dje na është lajmëruar nga ministria që do bëhet mësim normal, ndërsa nga drejtoria e shkollës mësimi do bëhet normal 45 minuta po do kalojë pasdite. Vetëm një klasë e tretë është paradite, mua nuk më duket normale që një fëmijë i klasës së tretë të mbarojë në pesë pasdite. Nuk do e sjellim fare fëmijën, do t’i dërgojmë në shkollë tjetër”, tha njëri nga banorët.
Një tjetër nga prindërit tha se situata është ekstreme, pasi njëri prej tyre i bie të ngelen pa punë, ose do bojkotohet mësimi.
“Kjo gjë nuk është e shëndetshme për fëmijët, ata do të jetojnë për këto 3 orë, nuk do kryejnë dot asnjë aktivitet jashtëshkollor. Nuk na janë përgjigjur siç duhet, është situatë kaotike dhe hapësira fizike gjenden për disa e për disa jo. Do të marrim vendimet tona, do shkrihet klasa sepse do i largojmë secili fëmijët. Për ne është situatë ekstreme, i bie që njëri nga ne të ngelet pa punë. Programin e kemi pare, 26 klasa paradite që janë fëmijë të rritur, nga klasa e pestë e poshtë pasdite. Ose do bojkotohet mësimi ose do lëvizim nga shkolla”, thanë banorët.
Ministria e Arsimit njoftoi zyrtarisht se sot nis mësimi i plotë nëpër të gjithë shkollat e vendit. Rreth 480 mijë nxënës në të gjithë vendin, nga klasa e parë në të 12-tën, do të rikthehen në shkollë me turne normale dhe orët e plota, 45 minuta. Pas më shumë se një viti, prej marsit të 2020 kur u shënua i infektuari i parë me Covid në vend, sot i rikthehen normalitetit.
Deri më tani, nxënësit kanë qenë ndër më të dëmtuarit si pasojë e pandemisë pas aplikimit me turne që zgjaste vetëm 25 minuta dhe nëpër banka të mos ishte më shumë se një nxënës, për të parandaluar përhapjen e virusit.
Por kjo metodë, shkaktoi vetëm pakënaqësi, pasi prindërit arritën të mblidhnin firma të mjaftueshme për peticionin që do të dërgohej në ministrinë Arsimit për të kërkuar rikthimin e mësimit normal nëpër shkolla.
Menjëherë pas shfaqjes së pakënaqësive, ministrja e Arsimit, Evis Kushi vendosi të reflektojë dhe të rikthejë mësimin normal nëpër shkolla siç ishte përpara pandemisë, por duke bërë thirrje për respektimin e masave anti-Covid.
