Partia e opozitës në Maqedoninë e Veriut, VMRO-DPMNE shpalli fitoren në zgjedhjet presidenciale dhe ato parlamentare që u mbajtën këtë të mërkurë.
Në një reagim pa u mbyllur ende procesi i numërimit, por që trendi i votave është shumë i vështirë të ndryshojë, VMRO-DPMNE deklaroi se ka siguruar 58 nga 120 vendet që ka parlamenti dhe fitoren e Gordana Siljanovska Davkova në garën për president me më shumë se 67% të votave përballë presidentit aktual Pendarovski.
Në kampin politik shqiptar, të dy koalicionet rivale kanë shpallur fitoren e tyre. Bashkimi Demokratik për Integrim me koalicionin Fronti Evropian thotë se është fitues absolut i zgjedhjeve, por pa saktësuar ende numrin e votave ose të vendeve në parlament.
Ndërkaq, koalicioni VLEN, që po ashtu ka deklaruar fitoren absolute, e vlerëson procesin e votimit si jodemokratik, me parregullsi e blerje votash, teksa kërcënon se do të ketë përgjegjësi për dhunimin e votës.
Megjithëse rezultatet ende nuk janë shpallur zyrtarisht, duket se humbëse e madhe në këto zgjedhje është Lidhja Social Demokrate. Sipas disa parashikimeve, ajo mund të ketë siguruar midis 24 dhe 26 vendeve në parlament,
Komisioni Shtetëror i Zgjedheve bëri të ditur më herët se është arritur pragu i nevojshëm prej 40% i pjesmarrjes në votime, që zgjedhjet presidenciale të quhen të vlefshme. Mbi 46 për qind është përfaqësimi në balotazh, teksa për zgjedhjet parlamentare është mbi 53 për qind.
Discussion about this post