Tre personat që terrorizuan dhe grabitën furgonin e pasagjerëve që sapo kishte mbërritur nga Italia në Vlorë, janë deklaruar fajtorë dhe dënuar me burg nga Gjykata e Vlorës. Gazetari Elton Qyno bën me dije se Armand Kuqi është dënuar me 14 vite burgim, Elmir Tufa me 16, ndërsa Ylli Murati, me vetëm 2.6 vite heqje lirie. Por për shkak se përfitojnë nga gjykimi i shkurtuar, dënimi do t’u reduktohet me 1/3.
Ata janë shpallur fajtorë për akuzat: “vjedhje me armë”, “mbajtje pa leje të armëve” dhe “moskallëzim krimi”. Por jo të gjithë janë dënuar pasi Elmir Tufa është ende në kërkim nga Policia e Shtetit. Ky i fundit, i njohur edhe me alias, Ermir Tufa nga fshati Buran i Krujës, dyshohet edhe si një prej autorëve të vrasjes së biznesmenit Shkëlzen Kastrati.
Grabitja e 19 mijë eurove ndodhi në 25 shtator 2018 në lagjen “Pavarësia 2” në Vlorë, ku Kuqi dhe Elmir Tufa, të armatosur dhe të veshur me uniforma policie, ku nën kërcënimin e armëve kanë marrë paratë e dy udhëtarëve që sapo kishin ardhur nga Italia në Shqipëri. Në këtë grabitje një person i tretë i ka ndihmuar duke i transportuar nga vendngjarja, jashtë qytetit të Vlorës, ku dhe kanë braktisur automjetin në fshatin Panaja.
