Vodhi makinë në oborrin e një banese, arrestohet 43 vjeçari

Një 43 vjeçar ka rënë në prangat e policisë së Tiranës për vjedhje. Mësohet se 43 vjeçari ka vjedhur një automjet tip ‘Opel’ në oborrin e një banese në rrugën “Bab Rexha” në kryeqytet.

Pasi e ka vjedhur, e ka fshehur mjetin në një garazh në zonën e Don Boskos.

Njoftimi i policisë

Vodhi një automjet në oborrin e një banese, identifikohet, kapet dhe vihet në pranga 43-vjeçari.

Shërbimet e Komisariatit të Policisë Nr. 2, në vijim të punës për garantimin e sundimit të ligjit në territor, pas informacionit të marrë se në oborrin e një banese në rrugën “Bab Rexha”, ishte vjedhur një automjet, kanë organizuar punën për identifikimin dhe kapjen e autorit të dyshuar dhe si rezultat kanë vënë në pranga shtetasin:

– A. S., 43 vjeç, banues në Tiranë.

Nga veprimet hetimore të kryera ka rezultuar se ky shtetas, ditën e djeshme, ka vjedhur një automjet tip “Opel”, në pronësi të shtetasit T. M., në rrugën “Bab Rexha”, dhe më pas e ka fshehur atë në një garazh në zonën e Don Boskos.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.