Një 42-vjeçar u arrestua nga Policia e Tiranës pasi ka vjedhur para nga një dyqan duke kanosur me thikë punonjësen. Ngjarja është regjistruar më 1 prill 2026 në rrugën “Kongresi i Manastirit”.
Sipas të dhënave, autori ka marrë xhiron ditore të biznesit dhe më pas është larguar nga vendi i ngjarjes. Policia konfirmon se ai ka qenë i dënuar më parë për vjedhje.
Gjatë operacionit u sekuestruan thika dhe veshjet që dyshohet se janë përdorur gjatë kryerjes së veprës penale. Arrestimi u krye në bashkëpunim me Drejtorinë Vendore të Policisë Durrës.
Njoftimi
Sekuestrohen thika dhe veshjet që dyshohet se ka përdorur 42-vjeçari, gjatë kryerjes së vjedhjes.
Shërbimet e Komisariatit të Policisë Nr. 4, në vijim të punës për zbardhjen e vjedhjeve, identifikimin dhe arrestimin e autorëve, organizuan dhe finalizuan operacionin e koduar “Tools”, si rezultat i të cilit u kap në bashkëpunim me shërbimet e DVP Durrës dhe vu në pranga shtetasi në kërkim:
-B. Sh., 42 vjeç, banues në Tiranë.
Ky shtetas dyshohet se më datë 01.04.2026, në rrugën “Kongresi i Manastirit”, ka vjedhur një shumë parash (xhiron ditore) në një dyqan, duke kanosur punonjësen, me thikë.
Vijon puna për dokumentimin e vjedhjeve të tjera që mund të jenë kryer nga ky shtetas.
Materialet procedurale i kaluan Prokurorisë së Tiranës, për veprime të mëtejshme.
Discussion about this post