Deputetja e PD, Albana Vokshi ka denoncuar këtë të hënë nga Ministria e Arsimit në Tiranë, situatën me të cilën duhet të përballen shumë prindër që kanë dërguar fëmijët në shkollë këtë vit të ri arsimor.
Vokshi tha se për shkak të mësimit me dy turne në shkolla ku ishte planifikuar rikonstruksioni, shumë prindër ishin detyruar të linin punët e tyre për t’u kujdesur për fëmijët që kthehen vonë nga mësimit.
“Prindër të cilët janë të detyruar që të presin fëmijët e tyre që dalin nga mësimi shumë të lodhur në atë orë të mbrëmjes. Prindër të cilët sjellin më pak të ardhura në familje sepse i kanë lënë punët për t’u kujdesur për fëmijët. Jam kontaktuar nga prindërit e disa fëmijëve të shkollës 9 vjeçare në Tiranë. Këta prindër janë gjendur përballë një veprimi absurd që fëmijët e tyre nuk do mësojnë më në shkollën Mihal Grameno por në Sauk. Pse është marrë ky vendim? Vetëm ministria dhe drejtoria e shkollës e di. Prindërit kanë protestuar ditën e premte dhe unë i inkurajoj që të vijojnë ta bëjnë diçka të tillë. Është një torturë sistematike që kjo qeveria ka rezervuar për prindërit dhe nxënësit për shkak të korrupsionit dhe të paaftësisë. Programi i rindërtimit të shkollave, është një dështim spektakolar. Ka tre vite nga tërmeti dhe ende këtë vit dhjetëra shkolla nuk mundën të hapnin dyert e tyre. Jo vetëm që nuk janë hapur këto shkolla sepse nuk ka përfunduar rikonstruksioni por disa prej tyre do të shemben për shkak të vendimeve të marra nga qeveria, vendime që askush nuk e di përse merren”, tha Vokshi ndër të tjera.
Discussion about this post