Kryetarja e Lidhjes Demokratike të Gruas së Shqipërisë, njëkohësisht deputetja e PD, Alban Vokshi, në Forumin e Grave të PPE, diskutoi për çështjen e ndërhyrjes e qeverisë në zgjedhje për të deformuar vullnetin e qytetarëve.
Sipas deputetes së PD, nën këto tetë vitet e fundit, vendi ynë ka bërë hapa pas me demokracinë, duke bërë që shumë të rinj profesionistë të largohen nga vendi.
“8 vjet nën qeverisjen e korruptuar të Edi Ramës, Shqipëria ka bërë hapa pas në lidhje me demokracinë dhe, shtetin ligjor, ndërsa integrimi europian ka ngecur në vend, për shkak të keqqeverisjes. Kjo ka sjellë largimin e qindra mijëra shqiptarëve, përfshirë të rinjtë dhe profesionistët më të mirë. Në 8 vjet, kryeministri grumbulloi të gjitha pushtetet në një dorë. Ai kontrollon qeverinë, parlamentin, gjyqësorin, pushtetin lokal, një pjesë të madhe të medias dhe shoqërisë civile. Çdo pushtet që zotëron, si një autokrat në mes të Europës, Edi Rama e vuri në shërbim të karriges së tij për të marrë mandatin e tretë në mënyrë të paligjshme. Raporti i OSBE/ODIHR evidentoi shkelje të rënda, që konfirmon se shteti u vu në shërbim të PS”.
Ndër të tjera, Vokshi njohu eurodeputetet, me disa fakte që sipas saj vërtetojnë ndërhyrjen e qeverisë në zgjedhje.
Vokshi tha se krimi më i madh elektoral ishte nxjerrja e të dhënave personale të të gjithë votuesve, së dyti kryeministri dhe ministrat abuzuan me postin dhe pushtetin e tyre, dhe së treti fondet e tërmetit, të shëndetësisë, legalizimet dhe punësimet elektorale u përdorën në mënyrë abuzive për blerjen e zgjedhjeve.
Vokshi shprehu shqetësimin e PD se me Ramën vendi po rrëshqet çdo ditë drejt autoritarizmit dhe se krimi organizuar dhe oligarkia kontrollojnë vendimmarrjen e qeverisë.
