Vokshi: PS nuk do transparencë mbi hetimet për shëndetësinë, por bllokim

Kryetarja e komisionit për hetimin e koncesioneve në Shëndetësi, Albana Vokshi në një deklaratë për mediat nga Kuvendi akuzoi deputët e Partisë Socialiste se po përpiqen të mbulojnë korrupsionin nëpërmjet bllokimit të kërkesave për informacion.

Ajo tha se PS ka kërkuar që në shkresat e ekspertëve të hiqen emrat e personave që kanë kryer Check-Up-in, gjë që sipas deputetes pengon zbardhjen e shkeljeve që fshihen pas këtij koncesioni.

Sipas Vokshit, qëllimi i mazhorancës është që të mos bëjë transparencë, por të bllokojë punën e Komisionit.

Po ashtu deputetja demokrate denoncoi Plarent Ndrecën se ka fyer dhe intimiduar ekspertët.

“Mbledhja e parë e komisionit u organizua në datë 25 mars. Sot, një muaj që PS me urdhër të Ramës për të mos bërë transparencë dhe për të mbuluar korrupsionin galopantë në shëndetësi kanë vendosur të bllokojnë kërkesat për informacion.

Një muaj refuzojnë të kalojnë në komision kërkesat. Ekspertët e PD Franci Nuri dhe Meri Likaj janë dakordësuar për numrin më të madh të shkresave vetëm për 3 shkresa ekspertët e PS kërkuan të heqin fjalët korrupsion madhor si dhe refuzonin të jepeshin emrat e personave që kanë kryer Check-Up-in. Më besoni këtu është shkelja më e madhe. Ka emra personash që nuk jetojnë më, jetojnë jashtë dhe nuk janë parë në Shqipëri. Është një bazë e mirë për të vërtetuar shkeljet që janë bërë.

Dua të identifikoj faktin që ekspertët e PS kanë qenë bashkëpunues, por dje e bllokuan në Komisionin Parlamentar.

Nënkryetari dhe sekretari gënjyen duke thënë se shkresat nuk i kemi marrë, ndërkohë që ja kam dërguar të gjitha shkresat.

Një tjetër çështje që dua të them është se nuk duan të bëjnë transparencë. Dje ata votuan kundër që të kalonin shkresat për informacion.

Edhe planin hetimor që vetë e dorëzuan refuzuan që ta lexonin. Ai është plani i tyre. Refuzuan sepse ai nuk është plan për të hetuar, por për të bllokuar komisionin hetimor.

Plarent Ndreca ka fyer, ka intimiduar ekspertët nëse ata do merrnin fjalën do ndesheshin me padi për shpërdorim të detyrës”, tha Vokshi.

Mes debateve, mbledhja e djeshme e komisionit të Shëndetësisë, u shty për të enjten (25 prill) në orën 11:00.