Albana Vokshi ka reaguar pas incidentit të ditës së sotme në selinë blu, ku një mbështetëse e kryedemokratit Lulzim Basha, u konfrontua me anëtaren e Komisionit të Rithemelimit Evi Kokalari.
Vokshi shkruan se Komisioni i Rithemelimit dënon çdo akt dhune verbale dhe fizike ndaj anëtarëve të këtij Komisioni, teksa shton se gratë po keqpërdoren nga ajo që Vokshi e cilëson si shoqata Bardhi-Basha.
“Komisioni i Rithemelimit të PD dënon me forcë aktet e dhunës verbale e fizike ndaj zonjave anëtare të Komisionit për Rithemelimin e PD dhe zonjave Kryetare të degëve dhe anëtare të LDGSH. PD është shtëpia e lirisë së cdo demokrati. Është e turpshme të keqpërdoren gratë nga Shoqata Basha – Bardhi, si mburojë njerëzore për ruajtjen e karrikes.”
Vokshi shkruan se Basha nuk mund të mbrohet nga askush për të iu shmangur vullnetit të delegatëve të Kuvendit Kombëtar të 11 dhjetorit, i cili sipas saj do të konfirmohet në referendumin e 18 dhjetori.
“Nuk ka logore e mburoje njerëzore që ta shpëtojë deputetin Basha nga vullneti i 4446 delegatëve të Kuvendit Kombëtar, kuvendit më spektakolar në historinë e pluralizmit politik në këto 30 vjet.Vullneti i 4446 anëtareve të Kuvendit Kombëtar që do të konfirmohet me referendumin e 18 dhjetorit, nuk do të mund të transformohet nga orkestra e cakorduar e Shoqatës Basha – Bardhi.”
Deputetja e PD-së shton se të tilla akte do të denoncohen para ligjit dhe përgjegjësit do të mbajnë përgjegjësi.
“Skenarët me vullnetarët e Lulzim Bashës do të denoncohen para ligjit dhe gjithë shqiptarëve dhe ideatorët dhe ekzekutuesit do të mbajnë përgjegjësi ligjore dhe morale.Komisioni i Rithemelimit të PD do vijojë punën e tij në ambientet e selisë së PD, si shtëpia e të gjithë demokratëve”, shkruan Vokshi.
Discussion about this post