“Rusia preferon të përdorë gazin natyror si armë, ku më shumë preferon ta djegë sesa ta shesë”. Kështu është shprehur presidentja e Komisionit europian Ursula von der Leyen, në samitin vjetor të G20 që po zhvillohet në Bali të Indonezisë.
Moska ndërpreu furnizimin me gaz të BE-së në fillim të këtij viti si hakmarrje për sanksionet e vendosura për pushtimin e Ukrainës.
“Ne shohim se Rusia po djeg gazin e saj në vend që ta shesë atë”, komentoi von der Leyen.
Sjellja e Rusisë “krijon mungesa në tregun global të energjisë dhe bën që çmimet të rriten në qiell”, shtoi ajo.
Për këtë arsye, BE-ja mbështet vendosjen e një tavani për çmimin e naftës, theksoi presidentja e Komisionit, duke shpjeguar se nga kjo do të përfitojnë edhe vendet me të ardhura të ulëta dhe të mesme.
“Por përgjigja jonë më e mirë ndaj kësaj situate është përshpejtimi i tranzicionit drejt formave të pastra të energjisë”, theksoi von der Leyen.
Kjo “është e vetmja përgjigje si për krizën klimatike ashtu edhe për krizën energjetike”, e cila gjithashtu ofron mundësi të mëdha për rajone të tjera të planetit.
Evropa do të investojë të paktën 4 miliardë euro në burime të rinovueshme të energjisë si hidrogjeni gjatë pesë viteve të ardhshme. Kjo do të nxisë edhe investime masive private, theksoi ajo.
Discussion about this post