Presidentja e Komisionit Evropian, Ursula Von der Leyen, i ka bërë thirrje Kosovës dhe Serbisë që të punojnë për normalizimin e marrëdhënieve.
Von der Leyen i kërkoi Prishtinës të nisë zbatimin e Asociacionit, ndërsa Serbia të pranojë njohjen de-facto të Kosovës.
“Ftojmë edhe Kosovën ta nisë procedurën për zbatimin e Asociacionit, kurse Serbia duhet të pranojë njohjen de-facto. Kjo është mënyra e vetme për të shkuar përpara”, tha presidentja e KE-së.
Pas takimit me presidenten Vjosa Osmani në Prishtinë, Von der Leyen në një konferencë për media tha se pas Kosovës do të udhëtojë për në Mal të Zi dhe Serbi.
“Edhe në Serbi atje do ti diskutoj edhe hapat që duhet të ndërmarrë Serbia për njohjen de-facto”, tha ajo
Presidentja e KE-së ka ripërsëritur sërish se e dënojnë ashpër sulmin e dhunshëm të 24 shtatorit që ndodhi në Banjskë të Zveçanit, derisa shtoi se autorët duhet të sillen para drejtësisë.
“Ne dënojmë fuqishëm sulmet e dhunshme të 24 shtatorit, dhe shpreh ngushëllimet për familjet, miqtë dhe kolegët e policit të vrarë. Një sulm i tillë është tërësisht i papranueshëm, dhe autorët duhet të sillen para drejtësisë”, tha Von der Leyen.
Ajo foli edhe për procesin e liberalizimit të vizave.
“Më kujtohet viti i kaluar që të dyja ne bëmë thirrje për liberalizim të vizave, dhe tani mund të them se ia dolëm. Që nga 1 janari kosovarët mund të gëzojnë lëvizjen e lirë. Kjo është një mënyrë fantastike për ti afruar njerëzit”, u shpreh Von der Leyen.
Discussion about this post