Kryetarja e Komisionit Evropian, Ursula Von der Leyen, është një nga përfaqësueset e BE që do të marrë pjesë në samitin me vendet e Ballkanit Perëndimor, që ka nisur punimet sot në Slloveni.
Para gazetarëve, Von der Leyen u shpreh se ky është një samit i rëndësishëm me vendet e Ballkanit Perëndimor, duke përsëritur dhe njëherë bindjen e saj se këto vende i takojnë BE.
“Ne duam të dërgojmë një mesazh të vetëm dhe të qartë që Ballkani Perëndimor i takon Bashkimit Evropian, ne i duam ata në BE dhe familjen tonë evropiane. Ne ndajmë të njëjtën histori dhe të njëjtat vlera”, ka thënë Von der Leyen.
Ajo ka shtuar se 6 vendet kanë bërë shumë reforma dhe se duhet ende punë në sundimin e ligjit dhe lirinë e mediave, teksa tha se duan t’ia bëjnë me dije Ballkanit Perëndimor se BE-ja është partneri favorit për ta.
Në takim është i pranishëm dhe kryeministri Edi Rama, i cili ka mbërritur një ditë më parë në Slloveni. Gjatë samitit, pritet të diskutohet rreth riafirmimit të perspektivës evropiane të Ballkanit Perëndimor, i cili është me interes strategjik reciprok dhe mbetet një zgjedhje e përbashkët strategjike. Gjithashtu në qendër të bisedimeve do jetë dhe zhvillimi i bashkëpunimit dhe rimëkëmbja socio-ekonomike të rajonit, në kontekstin e pandemisë së Covid-19.
