Disa familje në Kurbin janë ngritur në protestë para bashkisë ditën e sotme, me pretendimin se prej një muaji e gjysmë nuk kanë marrë bonusin e qirasë, ndërsa tërmeti i 26 nëntorit të 2019 i ka shkatërruar shtëpitë.
Ata shprehen se kanë 6 muaj që kërkojnë takim me kryetaren e Bashkisë, Majlinda Carën, për të marrë një përgjigje në lidhje me bonusin e qirasë dhe rindërtimin e banesave të tyre. Sipas tyre, gjatë gjithë kësaj kohe janë shmangur nga kryebashkiakja dhe se askush nuk po i jep një zgjidhje.
“Ne jemi të pastrehë, shtëpitë i kemi të dëmtuara. Nuk jemi takuar me kryetaren e Bashkisë, sa herë vijmë në Bashki dhe kërkojmë takim, kryetarja është larguar në drejtim të paditur, nuk po dimë se kur do kthehet në drejtim të ditur. Kemi 6 muaj që duam t atakojmë. Ne po protestojmë se bonusin e qirasë nuk na e kanë dhënë, ndihmën ekonomike jo, se ça do bëhet me shtëpinë nuk dimë gjë. Unë banoj akoma në çadër”, shprehet një banore.
Ata shprehen të irrituar se nuk kanë mundësi të paguajnë qiranë dhe se duan një zgjidhje sa më shpejt.
