Lindita Nikolla është zgjedhur kryeparlamentare me 79 vota pro, nga 83 vota të vlefshme gjithsej dhe 4 kundër. Numri i votave pro, ka bërë që ditën e sotme të ngrihen dyshime se 2 deputet të partive opozitare kanë votuar pro Nikollës. Kjo për faktin se nëse marrim votat e maxhorancës që janë vota pro, gjithsej janë 74, shtojmë këtu edhe 3 deputet të Partisë Social Demokrate, të Tom Doshit që e ka shprehur publikisht bashkëpunimin me qeverinë, bëhen 77 vota. Pra, sipas rezultatit 2 vota janë dhënë nga partitë opozitare, PD dhe LSI.
Por kush mund të jenë dy deputetët opozitar që kanë shprehur pëlqimin për zgjedhjen e kryeparlamentares së propozuar nga maxhoranca?
Dyshmet ngrihen akoma më shumë, pas moskoordinimit që kishin dje partitë opozitare për mënyrën e votimit, që nuk ishin në një linjë.
Deputetët e Partisë Demokratike zgjidhën që t’i grisnin fletët e votimit para kamerave. Nndërsa deputeti tashmë i larguar nga ky grup, Sali Berishës, nuk mori pjesë në votim. Të njëjtën gjë bënë edhe 4 deputetët e partive aleate me PD, Dashamir Shehi i LZHK, Agron Duka i PAA, Shpëtim Idrizi i PDIU dhe Fatmir Mediu i PR, duke mos marrë pjesë në votim.
LSI zgjodhi që të ndiqte rrugën normale të votimit, ku më pas për mediat nënkryetari i kësaj partie, Petrit Vasili, tha se ishin vota kundër.
Ndryshe veproi edhe kreu i partisë së minoritetit grek në Shqipëri, PBDNJ, Vangjel Dule dhe Nusret Avdullai, deputet i listë së PD në Fier, por nga radhët e PDIU-së. Por edhe këta të dy u shprehën se vota e tyre ka qenë kundër Nikollës, edhe pse ndoqën rrugën normale të votimit, ndryshe nga ajo e pjesës tjetër të opozitës.
Edhe pse janë shprehur se kanë votuar kundër, hija ngel mbi 4 votat e LSI dhe 2 deputetëve, kreut të PBDNJ Vangjel Dule dhe Nusret Avdullait nga PDIU. Këtu lindin dy dyshime të tjera, do ketë bashkëpunim LSI-PS, apo dy deputetët e partive të tjera kanë dhënë mesazhin se do të jenë zgjatim i Ramës nga radhët e opozitës në parlament?
