Kryetari i PD, Sali Berisha mbajti një fjalim me nota motivuese para anëtarëve të Këshillit Kombëtar të PD, të cilëve u tha se demokratët presin prej tyre udhëheqje, vizion dhe vendosmëri çdo ditë.
Berisha theksoi në fjalën e tij dhe dy “sëmundjet” nga të cilat rrezikohet udhëheqja e një opozitë. Sipas tij, pazaret për interesa personale dhe kënaqësia nga të pasurit një post, janë të rrezikshme për një opozitë.
“Si mund të jetë problem udhëheqja e opozitës? Dy janë sëmundjet e saj më kryesore, e para pazaret me qeverinë. Pazaret për interesa personale. Ato detyrojnë udhëheqjen të shkelmojnë mbi interesat e anëtarëve dhe shembulli më tragjik jemi ne, PD në vitet e shkuara. Ndaj dhe këtë mësim nuk duhet ta harrojmë kurrë, por sot ne kemi një ndryshim të madh. Ju uleni në këtë sallë tërësisht si përfaqësues të demokratëve shqiptarë të zgjedhur me votën e tyre, përfaqësues të vullnetit të tyre dhe jo të Kryesisë apo kryetarit të partisë. Kjo do të thotë që jeni përfaqësues të mënyrës më të shkëlqyer të përfaqësimit, të atyre që u besojnë, që ringritën PD në këtë nivel që e mbajnë gjallë e drejtimin e saj para alternativës “to be, or not to be”. Ata presin nga ju udhëheqje, vizion, vendosmëri çdo ditë. Sëmundja e dytë, e udhëheqjes opozitare, me efekte shkatërrimtare për opozitën është protagonizmi vantosh opozitar, të kënaqurit me protagonizmin se ke një karrige se ke një vend e mandat, një post, dhe të tjerët të shohin, po ti çfarë bën? Opozita profesioniste është opozitë që nuk duhet të ekzistojë”, tha Berisha.
Discussion about this post