Deputeti demokrat, Bledion Nallbati, u shpreh se opozita do të vijojë aksionin e saj opozitar brenda sallës së Kuvendit edhe gjatës seancës së të enjtes, ku pritet të hidhet në votim drafti final i amnistisë, prej të cilit përfitojnë 700 të dënuar dhe rreth 2500 persona në shërbim prove.
Nga studio e Top Talk, Nallbati tha se opozita do të vazhdojë me të njëjtin skenar, pra nuk do të lejojnë që të zhvillohet një seancë plenare normale.
“Nesër do vazhdojë i njëjti aksion që opozita ka nisur, për të kërkuar plotësimin e të drejtave të veta kushtetuese siç janë komisionet parlamentare dhe kjo është një ndër arsyet kryesore që nuk mund të marrim pjesë në këtë proces të amnistisë. Do të duhet të ketë një bisedim me opozitën, për kushtet që opozita ka, në lidhje me protestuesit, që janë qindra akoma në qeli. Nëse parlamenti do të ishte në situatë normale ne do ta votonim aministinë, me kushtin për protestuesit”, tha Nallbati.
Ai shtoi se deputetët e opozitës janë në luftë për njerëzit, janë të interesuar që të zgjidhte çështja, pasi komisionet hetimore janë çështje e të gjithë shqiptarëve.
“Do të duhet të gjejmë mundësinë për të arritur për të përfaqësuar interesat e shqiptarëve”, tha ai.
Më herët, përmes një postimi, Nallbati tha se “nuk ka propozuar asnjë amendament që synon apo parashikon faljen e zyrtarëve të korruptuar, që janë dënuar apo gjykuar nga Gjykata kundër Korrupsionit dhe Krimit të Organizuar.”
Discussion about this post