Vranë shqiptarin në “shtëpi bari” dhe i plagosën vëllain, gjykata lë në burg dy hajdutët

Gjyktata në Britaninë e Madhe ka vendosur të dënojë me burg Jason Sebran dhe Shaddai Smith.

Ata akuzohen se kanë vrarë shqiptarin Renato Geci gjatë një përpjekjeje për të rrëmbyer rreth 100.000 paund drogë nga një plantacion kanabisi. Të dy hajdutët hynë në shtëpinë e barit në Granville Avenue, Hounslow, në perëndim të Londrës, më 22 mars të vitit të kaluar. Prona ishte baza e një operacioni “të sofistikuar” për të kultivuar më shumë se 200 bimë kanabisi me një vlerë të vlerësuar prej 95,000 paundësh. Smith dhe Sebran u ngjitën në një shkallë dhe përmes dritares së banjos hynë në banesë ku gjetën shqiptarët Renato Geci, 21 vjeç dhe vëllain e tij Vilson Geci, 29 vjeç.

Prokurori Crispin Aylett KC deklaroi para juristëve se nisi një luftë e dhunshme me Smithin duke rrëmbyer një thikë nga kuzhina dhe Sebran ishte i armatosur me një kaçavidë.

“Renato u godit për vdekje me thikë, si dhe u godit me kaçavidë”, tha prokurori.

Më pas dy hajdutët u larguan nga dritarja, duke dalë nga banesa. Pas arrestimit të tij, Smith pranoi se do të vidhte lokalet dhe pretendoi se ishte sulmuar. Sebran i tha policisë se dikush tjetër kishte hyrë në shtëpi ndërsa ai priste jashtë në makinën e tij. Përshkrimi i Vilson Gecit për tatuazhet e një sulmuesi përputhej me shkronjat dhe numrat në krahët e Sebranit që ishin ditëlindjet e dy fëmijëve të tij.

Juria diskutoi për gati 25 orë për të shpallur Smith dhe Sebran fajtorë për vrasje dhe plagosje me dashje.