Dy vëllezërit të cilët akuzohen për vrasjen e një taksisti 71-vjeçar, pasi dyshonin se kishte lidhje intime me nënën e tyre, do të përballen si bashkëautorë në Gjykatën e Tiranës. Vëllezërit Sajmir dhe Arsil Shera do të përballen me akuzën e ‘vrasjes me paramendim’, teksa Gjykata e Tiranës ka pranuar kërkesën e Prokurorisë për të kaluar për gjykim dosjen në ngarkim të vëllezërve 33 dhe 21 vjeç, duke e konsideruar të plotë hetimin e rastit.
71 vjeçari Abdulla Budlla u qëllua me 7 plumba kallashnikovi pasditen e 3 Gushtit teksa kishte parkuar mjetin në anë të rrugës në Fushë-Prezë, pranë kryqëzimit të Rinasit. Prej vitesh ai punonte në të zezë si taksist. Vëllezërit Shera ishin të dyshuarit e parë të Prokurorisë për shkak të një konflikti të mëhershëm mes tyre dhe taksistit. Dyshimet u përforcuan edhe pas zbulimit të komunikimeve të gjata telefonike mes viktimës dhe nënës së dy të dyshuarve.
Për vrasjen e tij, dy vëllezërit Shera deklaruan para hetuesve se krimin e kryen për nderin e familjes, pasi i moshuari u kishte ngacmuar nënën dhe motrën. Ndërsa autorësinë e krimit e ka pranuar Sajmir Shera, i cili ka përjashtuar të vëllain si të përfshirë në këtë krim, duke pretenduar se ditën e vrasjes së Abdulla Budllës, i vëllai nuk ishte në dijeni dhe armën e kishte marrë vet ai për të kryer krimin.
Discussion about this post