Dy ditë pas vrasjes së një 14-vjeçarit pranë shkollës “Fan Noli” në Tiranë, kryeministri Edi Rama fajësoi rrjetet sociale për promovimin e dhunës dhe njoftoi mundësinë e mbylljes së tyre.
Teksa përmendi raste të kufizimit të rrjeteve sociale në botë, Rama u shpreh se “dilema jonë si qeveri është nëse duhet të provojmë edhe ne të ecim në drejtim të vendosjes së filtrave kur në fakt nga të gjitha eksperiencat e deritanishme në Europë apo përtej Europës, mësojmë se efektiviteti i tyre është ende shumë i ulët, ndërkohë që stimujt e dhunës dhe rastet e bullizmit në botën online të fëmijëve dhe të adoleshentëve, vetëm rriten apo të ndërmarrim një masë drastike për mbylljen e plotë të Tik-Tok-ut e pse jo, të SnapChat-it në territorin e Republikës së Shqipërisë”.
“Kemi vendosur që këtë dilemë ta hedhim për një diskutim të gjerë me të gjithë komunitetet e prindërve ku do të angazhohen të gjitha shkollat, nën drejtimin e Ministrisë së Arsimit për të marrë një vendim sa më demokratik për një problem kaq të madh, por e përsëris, kompleks në përmbajtjen dhe në zgjidhjen e vet”, shtoi.
Në një fjalim të mbajtur pas mbledhjes, Rama fajësoi edhe opozitën për përdorimin e gjuhës së urrejtjes. Akuza në këtë aspekt hodhi dhe ndaj medias. “Tragjedia e nxënësit 14 vjeçar, e familjes së tij dhe e komunitetit të shkollës Fan Noli është shumë e madhe për tu futur në perimetrin shumë të ngushtë të sherrit të një pseudo elite politike dhe mediatike e cila përditë, përnatë devijon çdo interes kombëtar e publik, çdo problem apo ngjarje dhe deri çdo fatkeqësi e tragjedi në kanalin e llumit të interesave të veta për pushtet e për biznes me ndjenjat dhe me hallet e popullit”, tha ai.
Rama tha gjithashtu se qeveria është duke punuar për ngritjen e një sistemi të ri dixhital për kontrollin e shkollave dhe klasave në vend me kamera inteligjente në bashkëpunim me qeverinë e Emirateve të Bashkuara Arabe. Kryeqeveritari tha se synohet që plani të jetë gati brenda 20 muajsh për tu implementuar më pas në shkollat e vendit.
Ngjarja e së hënës ka ngritur në opinionin publik pikëpyetje për sigurinë në shkolla dhe më tej për dështimin e institucioneve arsimore në përgatitjen e brezave të rinj. Megjithatë, roli dhe përgjegjësia e autoriteteve për rastin nuk u përmend nga kreu i qeverisë në fjalimin e mbajtur para kryeministrisë.
Vrasja e 14-vjeçarit vjen pas një sërë ngjarjeve kriminale kundër jetës të ndodhura nga që nga fillimi i vitit shkollor në shkollat e vendit apo që kanë pasur protagonistë nxënës.
Opozita kërkoi dorëheqjen e ministres së Arsimit Oegrta Manastirliu pas krimit pranë shkollës “Fan Noli” në Tiranë, megjithatë kërkesa u sulmua nga socialistët në seancën e fundit parlamentare.
Discussion about this post