Dy persona janë arrestuar nga policia e Korçës këtë të martë lidhur me vrasjen e një shqiptari në Athinë, në vitin 2008. Në pranga janë vënë Gëzim Latja dhe Armando Tarushllari alias Jetnor Cinellari.
Ata akuzohen për vrasjen në vitin 2008 të Arjan Xhambazit nga Pogradeci, asokohe 25 vjeç. Në atentatin në kryqytetin grek, u plagos edhe një person tjetër.
Burime zyrtare nga blutë saktësuan se ishte një letër-porosi nga autoritetet greke që çoi në identifikimin e autorëve të dyshuar: “Strukturat Hetimore të Drejtorisë Vendore të Policisë Korçë në zbatim të letër porosisë të dërguar nga Athina me qëllim identifikimin e dy autorëve të tjerë të ngjarjes së ndodhur më datë 06.12.2008, në bashkëpunim me Prokurorinë rihapën hetimet për identifikimin e dy bashkautorëve të tjerë të vrasjes së 25-vjeçarit”.
Ndaj dy të ndaluarve ishte nxjerrë urdhër-arrest nga prokuroria e e Korçës.
“Në vitin 2008 gjatë një konflikti për motive të dobëta, mbeti i vrarë shtetasi A.Xh. (Arjan Xhambazi) dhe u plagos një tjetër dhe për këtë ngjarje autoritetet greke mundën të identifikonin dhe ndalonin vetëm njërin prej tre autorëve të dyshuar të ngjarjes. Si rezultat i hetimeve, Policia e Korçës në bashkëpunim me Prokurorinë e Korçës bëri të mundur identifikimin dhe ndalimin e shtetasve: G.L. (Gëzim Latja), 41 vjeç, banues në Elbasan dhe A.T. (Armando Tarushllari alias Jetnor Cinellari), 52 vjeç, banues në Tiranë, për të cilët Prokuroria kishte nxjerrë urdhër ndalimi për veprën penale ‘Vrasja me dashje’, kryer në bashkëpunim”, thuhet në njoftimin e bluve.
“Vijojnë hetimet e përbashkëta në lidhje me dokumentimin e plotë të ngjarjes dhe ekstradimin e tyre drejt shtetit grek”, ndërsa “materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë”, shtuan të njëjtat burime.
Discussion about this post